ဆယ်ကျော်သက် ကိုယ်ဝန်ဆောင်မှု ပိုများလာသဖြင့် မှန်ကန်သည့် မျိုးဆက်ပွား ပညာပေးရန် လိုအပ်

ဆယ်ကျော်သက်အမျိုးသမီးများတွင် အရွယ်မတိုင်မီ ကိုယ်ဝန်ဆောင်မှုများ ပိုပြီးတွေ့လာရသဖြင့် မှန်ကန်သည့်မျိုးဆက်ပွား ပညာပေးမှုများ ပြုလုပ်ရန် လိုအပ်နေကြောင်း သားဖွားမီးယပ်အထူးကုဆရာဝန်ကြီး တွဲဖက်ပါမောက္ခ ဒေါက်တာစိုးလွင်က ပြောကြားသည်။

‘‘ကိုးတန်းကျောင်းသူလေးတစ်ယောက် ဗိုက်နာလို့ အော်ဟစ်ပြီး ဆေးရုံရောက်လာတယ်။ သူ့မိဘတွေကလည်း ကလေးက ဘာဖြစ်မှန်းမသိဘူး။ ဗိုက်နာလို့ လှိမ့်နေတယ်ပေါ့။ ကလေးပုံစံကလည်း ဝဝလေး။ ဗိုက်ကိုစမ်းမယ်လုပ်တုန်း တစ်ခါတည်းညှစ်လိုက်တာ ကလေးခေါင်းလေးထွက်လာတယ်။ အဲဒါကို တွေ့လိုက်ရတဲ့ သူ့အမေလည်း သတိလစ်သွားတယ်’’ဟု ၎င်းက ဆိုသည်။

ဆယ်ကျော်သက်အမျိုးသမီးများ အရွယ်မတိုင်မီ ကိုယ်ဝန်ဆောင်သည့်ဖြစ်ရပ်များ လျော့နည်းလာစေရန် သိသင့်သိထိုက်သည့် မျိုးဆက်ပွားပညာပေးမှုများ ပြုလုပ်ပေးရမည်ဖြစ်ကြောင်း ဒေါက်တာစိုးလွင်က ဆိုသည်။

‘‘မိဘက ကိုယ့်ကလေးကို ကျောင်းနဲ့အိမ်၊ ကျူရှင်နဲ့အိမ် မျက်စိအောက်က အပျောက်မခံဘဲ စောင့်ရှောက်နေတာပဲ။  ဒါပေမဲ့ ကိုယ့်ရဲ့သမီး ရာသီမလာလို့  စစ်ကြည့်လိုက်တော့ ကိုယ်ဝန်ရှိနေတယ်။ ဒီလောက်ဂရုတစိုက်နဲ့ စောင့်ရှောက်နေတာတောင် ဘာဖြစ်လို့လဲ ကြည့်လိုက်တော့ သူက ကျူရှင်အိမ်ပေါ်အတက်ပြပြီး နောက်ပေါက်ကနေ ဆင်းသွားတယ်။ ချစ်သူနဲ့ချိန်းတွေ့ပြီး ကျူရှင်ဆင်းချိန်အမီ ပြန်လာတယ်။ ပြီးတော့ မိဘစောင့်နေတဲ့ ကားပေါ်တက်ပြီး ပြန်သွားတာ’’ဟု ၎င်းက ပြောကြားသည်။

ထို့ကြောင့် လိင်မှုဆိုင်ရာ သဘောသဘာဝနှင့် မျိုးဆက်ပွားကျန်းမာရေးပညာပေးမှုများကို မိဘများအနေဖြင့် မိမိ၏ သားသမီးများအား ပြောပြရန် လိုအပ်လာကြောင်း၊ ပညာရေးစနစ်တွင်လည်း ထည့်သွင်းသင်ကြားပေးသင့်ပြီဟုယူဆကြောင်း အထွေထွေရောဂါကုဆရာဝန် ဒေါက်တာကျော်စွာဦးက ဆိုသည်။

‘‘မိဘက လက်ဦးဆရာပဲ။ သားသမီးတွေကို လိင်မှုဆိုင်ရာ သဘောသဘာဝတွေ၊ မျိုးဆက်ပွားကျန်းမာရေးတွေ၊ စိတ်နေသဘောထားတွေ ဒါတွေကို သင်ကြားပေးရမယ်။ ရှေးရိုးစွဲအတွေးတွေ မရှိသင့်တော့ဘူး။ ကိုယ်ပြောပြမှသိပြီး ကလေးက ဒါတွေစိတ်ဝင်စားမယ်လို့ ထင်တာမျိုးမဖြစ်သင့်ဘူး။ နည်းပညာခေတ်ကြီးမှာ ဖုန်းတစ်ချက်နှိပ်တာနဲ့ ဒါတွေသိကြမယ်။ ကိုယ့်ရဲ့ကလေးကို အသိတရား၊ ဝေဖန်ပိုင်းခြားနိုင်စွမ်းရှိတဲ့ တွေးခေါ်မှုရှိအောင် သင်ပေးဖို့လိုတယ်။ ပညာရေးစနစ်တွေမှာ Sex Education နဲ့ပတ်သက်ပြီး သင်ရိုးညွှန်းတမ်းမှာ ပါသင့်ပြီ။ လိုအပ်တယ်’’ဟု ၎င်းက ပြောသည်။


Credit : 7Day Daily